d'n Droadnaegel had d'r ok as titel boaven können zetten: "Bugen of barsten", moar dat loat ik an de laezers oaver.
Alle veranderingen bunt nog gin verbetteringen.!!! Op die gedachten kwam ik noadat ik de krante weer is goed e-laezen had. Meestentieds leg ik dan potlood, papier en een schere kloar um datgene uut te knippen, wat mien wel liekt veur een vehaaltjen.
Biej 't deurblaajen van de krante zag ik een bericht stoan, dat tante Pos de roje dubbele brievenbussen goat veranderen. "Wat is doar noe weer niet goed an?", zo vroeg ik mien af. De linkerkante, zo wette wiej intussen ollemoale al wel, is veur de streek¬pos en rechs veur de oaverige bestemmingen.
't Blik niet meer te werken sinds ze de poscode uut e-vonden hebt, want de busse woar de streekpos in mot is meestentieds zowat leug, terwiel de rechterkante altied töt barstens toe vol zit.
Noe kump op die twee kleppen de poscodes te stoan, dus links de getallen veur de oaverige bestemmingen en rechs de poscodes veur de umtrek en den busse is noa gelang iets groter e-maakt dan de linker busse, want doar kump völle meer in terechte.
Dat mot volgens de "geleerden" biej de pos noe better werken.
De Pos hef die uutvinding al stiekum uut e-probeert in de umgeving van Eindhoven en de juffrouw die doar oaver geet vond,dat 't publiek doar moar oaver mos beslissen of 't goed uutvölt of niet. Zo konnen ze dan de mening van de klanten better peilen, aldus juffrouw "Geluk", want zo heiten dat mense ok nog.
Eerder hef de Pos ok al an e-kondigt tweehonderd vieftig gulden te loaten betaal'n veur de postbussen in de hal van het postkantoor, diet al joaren gratis bunt veur heur klandizie. Dat was dus nog in den tied dat de gulden in omloop wazzen.
Noe komt ze dus doar biej de Pos inens töt de conclusie dat doar ok al geld biej mos.!!! Biej de post denkt ze : "Wat vandage modern is, da's margen alweer knap olderwets". 't Is hoas niet meer biej te benen, zo gauw dat ze an 't veranderen sloat.
"t Kos wel heupe geld, want sinds kort bunt de roje bussen weer vervangen veur de oranje kleur. Margen vindt d'r biej wieze van sprekken weer één of andere "Loog" biej de pos, die doar veur e-studeert hef, uut, dat wiej de brieve en pekskes eiges moar mot votbrengen, want zo redeneert den "brief-
o-loog", dat dut dan de thermometer op de loonkosten¬post van de pos beheurluk doen zakken.!!!
Ik bedoele doar met te zeggen beste laezers, dat vandage an de dag niks meer heilig is en de regels en wetten net zo gauw weer wordt af e-brokken asdat ze e-maakt en uut e-vonden bunt.
Da's niet allene biej de pos zo, moar ok biej de plietsie.
In een pagina groot krantenberich schrif enen adjudant buten dienst oaver de verloedering biej de vrouwluu en manskaerls van de Hermandad, zo-at ze de plietsie ok wel nuumt. De agent mot weer van onbesprokken gedrag waezen, zo schrif den adjudant van 72 joar old en dus met een goeie dienst-ervaring achter zien rugge.
't gebrek an normen en weerden, is de oorzaak van corruptie. En zo vindt den man van de olde stempel, dat de plietsie ten dode op e-schreven is, as de discipline biej de jonge agent niet terugkeert. Dus 't korps in ‘t blauw krig d'r nogal van langs.
Ja, luu, wiej mot met de tied met blieven goan, moar dat wil nog niet zeggen da'w de normen en weerden an de kante mot schoeven.
Een ander verhaal in de krante was , dat de kamerleden, die de miljeutop in Japan biej goat wonen, eers een spoedcursus heb e-had in 't buugen met de kop, want da's doar een teken van weerdigheid, zo schrieft ze.
Hoe dieper men bug, des te groter is 't ontzag veur de persoon in kwestie. s'Land's wieze, s'Land's ere. Ik hebbe d'r zo mien eigen mening oaver, moar dat dut d'r hier niet toe.
't Dut mien wel denken an wat mien vrouw en mien is oaverkommen biej 't verloaten van een Chinees-Japans restau¬rant. Mien vrouw had disse keer af e-rekkend, meestentieds doe ik dat eiges. Den Cinesen eigenaar brach ons pesoonluk noa de uutgang en hé boag as een kniepmes veur de hele femilie, toe'w zien zaak uutgingen. An 't ende van de stroate kek ik nog is umme en doar ston den Chinees waarachtig nog steeds te bugen, tötdat wiej uut 't zicht van um verdwenen waar'n. Ik zeie tegen de vrouw : "Ik wet niet wat veur een fooi of iej den kaerl e-geven hebt, 't mot wel heel wat waezen e-wes volgens mien gevuul, want he steet doar nog steeds te bugen as een kniepmes".
Dat bugen van den Chinees was niet normaal meer, wat een ontzag had den man veur mien vrouw of, zol 't toch veur heur knippe waezen e-wes?
w.g. D'n Droadnaegel
Geen opmerkingen:
Een reactie posten